Łómno – Jaworowy - Łómno

Trasa: Łómno – Jaworowy - Łómno
Delka: 37,6km
Czas: 3h 02’
Trudność: średnio ciynżko
Przewyszyni: 586m
Przeciyntno: 11,8km/h

Czasy sóm orientacyjne a trzeba rachować, że sóm „czyste”. Tak jak bydziecie planować jakisi piweczko na kierejsi chacie, tak se to musicie dorachować..

	km	czas
zastawka „Matyszczyno Łónka”	start
osada Główczyn	2	13’
odboczka na Kamienity	2,7	17’
Kamienity	6,5	40’
Babi Wyrch	8,2	53’
Kałużny	9,9	1:00’
U Kalużnego	10,3	1:05’
Nad Planou Dolinou	14,5	1:20’
Pod Małym Jaworowym	18,5	1:37’
Jaworowy chata	19,3	1:45’
Jaworowy wyrch	21,2	2:01’
Szyndelno	23,4	2:12’
Ropica	24,5	2:20’
Kalużny	27,7	2:35’
Kamienity	30,6	2:48’
zastawka „Matyszczyno Łónka”	37,6	3:02’

Zaczyno se przi autobusowej zastawce Matyszczyno Łónka a odboczy se z głównej w kierunku Polany a Kozubowej. Cesta rychło nabiyro sklon, tak to nieprzeganiejcie hned od poczóntku , bo stoupak bydzie dość dłógi. Jedzie se po asfaltce kolem potoka a chat aż przijedziecie ku mostku kaj cesta skrynco o 180 stopni. Po 200 m uwidzicie po prawej a kapke niży i po lewej strónie chałupy - osade. Główczyn. Na przeciwko przez doline je pieknie widać grzebiyń Połómia. Eszce asi 500 m a je odboczka na Kamienity. Kdybyście jechali dali po cescie, dojedziecie na Kozubowóm. Teraz se pojedzie mirnie do kopca niecałe 4 km po pieknej leśnej ceście. Po miniynciu turystycznej trasy na Kozubowóm se po rowince dojedzie aż ku chacie na Kamienitym. Chata na Kamienitym je bywało szkoła a mo ciekawóm historie. Bydzie se wóm tu nabetón podobać, piweczko czepujóm superowe. Dali pokraczujymy nejprzód po łóńce a potym lasym aż na grzebiyń na Babi wrch a dali do kopca aż na Kałużny. Tu odboczymy smierym na chate na Ostrym a pod Kałużnym po zimowej ceście kierunek Jaworowy. Je to tako szutrowo – leśno cesta, kiero idzie wicemenie po wrstewnicy. Akórat se je trzeba dowac pozór na odboczke, kiero wiedzie do lasa. Po wyjechaniu z lasa natrefiymy za rozdroże Nad planou dolinou. Dali se uż jedzie fórt po ceście aż przijadymy na asfaltke Pod M. Jaworowym, kiero wiedzie do kopca aż na chate na Jaworowym. Od chaty jadymy w kierunku wierzchołka Jaworowego a potym zjazdym a po rowince aż ku Szyndelnej. Potym uż przez Ropice dojadymy aż na Kałużny a napojymy se na ceste, kieróm my jechali na poczóntku. Tak przez Kamienity a Główczyn se wracomy spatki aż ku zastawce do doliny. Eszcze tu je jedyn wariant, ze z Kamienitego pojedziecie przimo po łónce na dół a wyjedziecie przi zastawce Doubrava asi 4 km nad Matyszczynóm Łónkóm. Trasa je w celku pohodowo, jo uż jóm jechoł aji z 10 letnim synym a żónóm. Oba to zwladli w pohodzie, tak se tego nie bójcie.

Web © 2004 -2024 MM Sound & Global Net